فلاحة مصرية بالوشم متزينة وبالحنة متحنية

احكى يا شهرزاد.. احكى لشهريار.. اشغليله ليله لطلوع النهار.. حيريله باله وغيريله حاله وخلى عقله دايما فى حالة انبهار.. احكى يا شهرزاد

بس كفاية يا بنات غنا وكلام، شهريار بتاع اليومين دول مفيش حاجة بتغير حاله ولا بتحير باله.. تعالوا معايا وانتوا تشوفوا

مولاى شهريار ياللى خليت عقلى طار عايزة أحكيلك الليلة حكاية فلاحة مصرية بالوشم متزينة وبالحنة متحنية وعلى راسها شايلة قفة فيها بعض الحصى وبالرمل مليانة ماشية على شط اسكندرية عروس الشرق فرحانة قابلت شاب من بين الشباب زين قالتله نبين زين ونخط بالودع زين قالها وضحى أكثر أنا الأسكندر الأكبر قالتله نقرا الطالع ونكشف المستور ونبين رفض الأسكندر وقالها عندنا الفلاسفة وعلماء الفلك أقدر لكن حبيبته "تاييس" قالت ليه مانسمع.. رمت العرافة الودع على الأرض وخطت خطوطها بالطول والعرض قالت مدينتك يا أمير هيكون ليها شأن كبير هتكون جنة الله فى الشرق لكنك هتموت بره أرضها بعد ما تهزم عدوها وفعلا هزم الأسكندر الأكبر بلاد الفرس ودخل بلاد الهند ومات الأسكندر وعمره 32 سنة فى عز شبابه فى بابل بعدما اشتد به المرض وزاد، مولاى نور الصباح لاح ويجب أن أسكت عن الكلام المباح، سيبنى لبكرة الله يخليك